Nan Life In Abundance, nou kwè toutbon vre ke tout moun gen yon bagay pou yo ofri. Lè moun toupatou sou latè reyini ansanm pou pran swen youn lòt avèk jenewozite, pataje an abondans, bezwen yo satisfè epi pwoblèm yo rezoud. Se poutèt sa nou fèk lanse fòmasyon Grenn Jenerozite nou an nan Afrik ak Karayib la pou ankouraje kretyen nan Sid Mondyal la pou yo rete jenere ak sa Bondye ba yo.
Fòmasyon an se yon evènman yon jou oubyen yon etid uit semèn ki pale sou 8 tèm prensipal ki gen ladan yo: misyon Kris la, modèl lidè yo dwe bay, ak bay sa nou kapab. Plis pase 8,000 moun ki soti nan 8 peyi LIA ak plis pase 160 legliz nou asosye avèk yo deja konplete pwogram sa a epi yo te mobilize pou itilize resous lokal yo pou sipòte youn lòt ak moun ki bò kote yo.
Yon legliz ki wè yon diferans byen koni grasa Grenn Jenerozite se Legliz Bondye nan Adjumani, Uganda. Atravè fòmasyon an, yo te raple kongregasyon an ke yo se jeran bon kado Bondye ba yo; ke bay se pa pou yon gwoup moun an patikilye, men pou tout moun; epi lè ou ofri tan ou, konpetans ou, lanmou ou, lajan ou, ak lòt bagay ou genyen bay Senyè a, li kapab itilize epi miltipliye kado sa yo.
Depi fòmasyon an, dizyèm mansyèl legliz la ogmante an mwayèn plis pase 10 fwa kantite lajan yo te konn resevwa a, paske manm yo gen yon atitid jenere epi yo angaje yo pou bay regilyèman. Yo gen je tou pou wè bezwen ki bò kote yo epi y ap vini ak solisyon kreyatif ki baze sou sa yo deja genyen. Yon manm legliz te toujou vin nan sèvis dimanch la abiye ak menm rad la. Yon lòt manm te remake sa epi li te pote de pantalon pa l pou mesye a mete. Yon refijye Soudanè nan kominote a, ki te gen senk òfelen pou l pran swen, te resevwa rad ak manje nan men kèk nan manm legliz yo. Anpil lòt moun te mete tèt ansanm pou jwenn nouvo ekipman ak inifòm pou koral yo a. Legliz la te menm kapab pwodui yon nouvo chante ak videyo adorasyon grasa jenewozite pèp li a.
Jan kourikoulòm nan anseye a, "jenerozite se ministè." Nou wè Bondye ap travay nan fason puisan pandan kretyen yo ap kiltive grenn jenerozite nan lavi yo. Priye avèk nou pou Senyè a kontinye pwodui bon fwi atravè fòmasyon nou yo epi pou anpil moun atravè mond lan pataje an abondans atravè travay LIA a.
